Dan liked tae say that he found me up the hills, but he didnae. Ah wis mindin’ ma ain business, sittin’ on a shelf in the garden centre, wi’ the rest o’ ma herd, when ah saw the lassie. She picked me up and took me tae a desk, where a wifie shone a red light at me an’ then the lassie put a bit o’ plastic in a slot, and dialled the magic number. Then she lifted me up and the next thing ah kent wis that ah wis oot in the cauld. Brrr. The lassie walked up tae a car and there wis a wee auld man sittin’ in the car. When he saw me, he broke intae a big, beamin’ grin. The lassie opened the car door and the man said, “is that for me?” The lassie laughed and said, “aye, if ye like.” Ah sat oan the auld man’s knee. “What do you want to call him?” the lassie asked the auld man. “Hamey” said the auld man, and that wis me. Ah wis called Hamey. It wis the 13th of June, 2015. Ah suppose you could ca’ that ma birthday.